Ginhubad ni Alex G. Lagunzad han kan Malaya Arevalo nga The Fallen Still Stand with Us
nagpapahinumdum an huring han kauumhan,
bikho ngan nguyngoy an naghuhulos han katunaan,
samtang ginlilitaniya han mga punglo an ira mga ngaran,
tiburuto na an kaburusdan,
an tim-os nga pangandoy han katadungan,
naagurok ha tiyan an kawarayan,
mga parag-uma ngan mga trabahador kita;
waray tuna ngan waray puruy-anan;
ginbalo ngan gin-ilo,
ginsakit ngan ginhikawan;
igin-anak kita han katilingban nga matiyupion,
mga binhi han pakigbisog nga mabayanihon,
iginbuswak ha tagu-angkan han kasaysayan,
ginwaklit han mga kamot nga matalumpiguson!
tikang ha matag-turnilyo, an ira makina ginmugna naton
an ira hagtaas nga bablay, ginpanday han at mga butkon;
kilala nat an katunaan tikang ha kabubkiran ngathon ha baybayon
nga aton ginpatambok pinaagi han at pagguol.
diri kita layon-layon nga magpapabantad.
diri kita kabanwaan nga ha ira magpapagabot.
tuyo nira kita pamingawon, ginnomrahan kita nga terorista
ginpauranan hin hilo ngan granada ha at mga protesta
ginsulod ha karsel hin buwa-buwa la nga mga kiha
tuyo nira kita ubuson, an at mga lideres ira panmatayon,
tungod kay at gintawag an kalibutan nga at urukyan
ngan an mga kablas ginkilala ta nga at kabugtuan,
at gintirok an mga gin-gugutom, urusa nga gin-uma an kawanangan,
ginsugbong an ira pag-antos, ginpuno an kakarsadahan.
lugaring diri kita mapatarhog
at mga tingog padayon nga magdadahunog,
at mga hingyap naglalamrag sugad hin dugalwong,
pagpara kanan panalumpigos mga lambong,
diri kita mahahadlok
kay an at mga tingog nga nag-aaningal tikang ha kauumhan ngadto ha mga pabrika,
ig-guguliat an katadungan
kita nga igin-anak han katilingban nga matiyupion,
mga binhi kita han pakigbisog nga mabayanihon,
kanay bungkog gintatamakan han kanan estado kamadarahog
an kalibutan amo an aton urukyan,
an mga kablas in aton kabugtuan,
hasugon ta an kadalanan dara mga hingyap han kalamragan,
diri kita bisan san-o mahahadlok
kay an mga nagkawara padayon nga aanhi kaburunyog naton,
kay an mga martir padayon nga buhi dinhi han aton pakigbisog.
